Ҷабҳаи озодии Афғонистон аз оғози истиқрори воҳидҳои фармондеҳии худ дар минтақаҳои мухталифи вилояти Бадахшон хабар додааст.

Ин ҷабҳа рӯзи шанбе, 16-уми май бо нашри наворе аз неруҳояш гуфтааст, ки амалан дар майдони ҷанг дар Бадахшон ҳузур дорад ва дар моҳи гузашта дастикам чор мавриди ҳамла ва даргирӣ дар ноҳияи Ҷурми вилояти Бадахшон, ба вижа дар дараи Хастак, рух додааст. Ба гуфтаи ин ҷабҳа, ҳамлаҳои Толибон бар минтақаҳои таҳти фармондеҳии онон “рафъ ва нобуд” карда шудааст.

Ин ҷабҳа навиштааст, ки дар натиҷаи ин даргириҳо, неруҳои гурӯҳи террористии Толибон талафот ёфта ва маҷбур ба ақибнишинӣ шудаанд.

Дар идомаи ин эъломия омадааст, ки ҳузури неруҳои ин ҷабҳа дар бархе минтақаҳои Бадахшон афзоиш ёфта ва онон ин вазъиятро бахше аз раванди созмондеҳӣ ва густариши фаъолиятҳои низомии худ унвон кардаанд.

Ҷабҳаи озодии Афғонистон ҳамчунин, гуфтааст, ки гурӯҳи террористии Толибон дар бархе минтақаҳо иқдом ба маҳдудияти рафтуомад, тафтиши хона ба хона ва боздошти афрод кардаанд.

Ин ҷабҳа дар бахши дигари эъломияи худ аз мардуми Бадахшон ва аксари вилоятҳо хостааст аз ончи “мубориза бар зидди ситами Толибон” хонда мешавад ҳимоят кунанд ва таъкид кардааст, ки фаъолиятҳои худро идома хоҳад дод.

Dialog.tj