Муассисаи давлатии «Тоҷикфилм» озмуни ҷумҳуриявии сенариянависонро бо номи «Кӯдакону наврасон – ояндаи миллат» эълон кард.

Бинобар иттилои манбаъ, озмуни мазкур бо мақсади офаридани филмҳои ҳунарии бачагона ва бахшида ба 35-солагии Истиқлолияти давлатии Ҷумҳурии Тоҷикистон роҳандозӣ гардидааст.

Гуфта мешавад, ки филмномаҳои пешниҳодшуда бояд ғояҳои ватандӯстӣ, ростқавлӣ, дӯстӣ, инсондӯстӣ ва ташаббускориро инъикос намуда, инчунин, ҳадафи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд»-ро инъикос кунанд.

Ҳамчунин, таъкид мегардад, ки бояд филмномаҳо дар ҳаҷми на камтар аз 40 саҳифаи А4 ва се нусха то 1-уми сентябри соли равон пешниҳод карда шаванд.

“Озмун дар доираи сеюмин Синамоҷоизаи миллии «Тоҷи Сомон» моҳи октябр ҷамъбаст гардида, муаллифони беҳтарин бо ҷоизаҳои пулӣ ва туҳфаҳои хотиравӣ қадрдонӣ мешаванд. Филмномаҳои ғолиб аз ҷониби Шурои бадеӣ барои наворбардорӣ тавсия мегарданд”, - зикр кардааст манбаъ.

Dialog.tj