Як мақоми низомии Иёлоти Муттаҳида мегӯяд, Афғонистон ҳамчунон дар маркази таваҷҷуҳи ниҳодҳои амниятии ин кишвар дар заминаи назорат бар фаъолиятҳои гурӯҳҳои террористӣ қарор дорад.

Расонаҳои амрикоӣ рӯзи ҷумъа, 15-уми май гузориш додаанд, Брэд Купер, сардори фармондеҳии марказии ИМА дар ҷаласае дар баробари қонунгузорони кишвараш гуфтааст, ки Афғонистон ҳанӯз яке аз марказҳои аслии таҳдидҳои террористӣ ба шумор меравад.

Ӯ таъкид кардааст: “Афғонистон ҳанӯз дар хати муқаддами фаъолиятҳои террористӣ аст, ки мо зери назар дорем”.

Купер афзудааст, ки ҷузъиёти бештари ин мавзуъ бояд дар нишастҳои маҳрамона матраҳ шавад.

Ба гуфтаи ӯ, Иёлоти Муттаҳида аз тариқи ҳамкорӣ бо шарикони минтақавиаш талош дорад таҳдидҳои эҳтимолии Афғонистонро нобуд ва саркӯб кунад.

Купер афзудааст, ки Вошингтон ба гунаи дақиқ вазъияти минтақаро зери назар дорад ва ҳар навъ таҳдидро ҳадаф қарор медиҳад.

Ин изҳорот дар ҳоле матраҳ мешавад, ки мақомоти амрикоӣ пас аз хуруҷи неруҳои ин кишвар аз Афғонистон дар соли 2021, ҳамчунон нисбат ба фаъолияти гурӯҳҳои шабҳинизомӣ дар ин кишвар изҳори нигаронӣ мекунанд.

Бо ин ҳол, гурӯҳи террористии Толибон ҳамвора ҳузури гурӯҳҳои дигари террористӣ дар хоки Афғонистонро рад кардаанд.

Дар ҳамин ҳол, Вазорати хориҷаи Иёлоти Муттаҳида пештар дар вокуниш ба изҳороти мақомоти русӣ дар бораи ҳамкорӣ бо Толибон, ҳушдор дода буд, ки ҳеч кишваре набояд бо ончи “бозигарони бад” хонда шудаанд, ҳамсӯӣ кунад.

Dialog.tj