Шабакаи неруҳои шаҳрвандӣ ва демократии Афғонистон (ACDFN) эълом кардааст, ки Афғонистон ҳамзамон бо панҷумин соли тасаллути дубораи гурӯҳи террористии Толибон, дар вазъияте қарор гирифтааст, ки метавон онро “дар остонаи фурӯпошӣ” тавсиф кард.

Ин шабака рӯзи сешанбе, 12-уми май бо нашри эъломияе гуфтааст, ки бо вуҷуди кумакҳои густардаи башардӯстона ва талошҳои минтақаӣ, Толибон натавонистаанд дар заминаи ислоҳоти сиёсӣ, ҳукуматдорӣ ва ҳуқуқи башар пешрафти қобили таваҷҷуҳе дошта бошанд.

Дар ин эъломия омадааст, ки нишондиҳандаҳои рушди инсонӣ дар Афғонистон рӯ ба суқут аст ва фақр ба шакли нигаронкунандае афзоиш ёфтааст.

Ҳамчунин, таъкид шудааст, ки таҳдиди терроризм ва ифротгароӣ дар Афғонистон рӯ ба густариш аст ва маҳдудиятҳои шадид бар ҳуқуқи занон ва фаъолиятҳои маданӣ ин кишварро ба суқут бурдааст.

Аъзои ин шабака аз Созмони Милал ва ниҳодҳои байналмилалӣ хостаанд, то як рӯйкарди ҳамоҳанги сиёсӣ, ҳимоят аз ҳуқуқи башар ва таваҷҷуҳ ба хатарҳои амниятии минтақаиро дар қиболи Афғонистон дар пеш бигиранд.

Шабакаи неруҳои шаҳрвандӣ ва демократии Афғонистон таъкид кардааст, ки идомаи вазъияти кунунӣ метавонад буҳрони Афғонистонро амиқтар сохта ва паёмадҳои он фаротар аз марзҳои ин кишвар густариш ёбад.

Dialog.tj