Гурӯҳи террористии Толибон эълом кардаанд, ки Нидомуҳаммад Надим, вазири таҳсилоти олии ин гурӯҳ, бо як ҳайат ба шаҳри Қазони Ҷумҳурии Тотористони Русия сафар кардааст.

Ҳофиз Зиёуллоҳ Ҳошимӣ, сухангӯи Вазорати таҳсилоти олии вобастаи Толибон, рӯзи 11-уми май бо нашри хабарномае гуфта, ки ин ҳайат ба ҳадафи иштирок дар нишасти “Русия ва ҷаҳони ислом” ба Қазон рафтааст.

Бар асоси хабарнома, дар ҳошияи ин нишаст, ба дархости Русия, нахустин нишасти “Комиссияи муштараки иқтисодӣ ва тиҷоратӣ” миёни Толибон ва Русия низ баргузор хоҳад шуд.

Ба гуфтаи Вазорати таҳсилоти олии Толибон, ин нишастҳо дар шаҳри Қазон аз 13 то 15-уми майи соли 2026 баргузор мешавад.

Ин дар ҳолест, ки Толибон пас аз тасаллути дубора бар Афғонистон, талошҳои худро барои густариши равобити дипломатӣ ва иқтисодӣ бо кишварҳои минтақа ва ҷаҳон афзоиш додаанд ва Русия низ равобиташро бо ин гурӯҳи террористӣ бо баҳонаҳои амниятӣ пайваста тақвият медиҳад.

Dialog.tj