Мансур Нигматов, блогери тоҷик, ки барои осебдидагони офати табиӣ дар Кӯлоб маблағ ҷамъоварӣ карда истодааст, хабар дод, ки ғолиби номинатсияи “Мисс интеллект”-и Озмуни шаҳрии “Мисс Душанбе” Субҳия Тоҳирзода ба мардуми зарардида 50 ҳазор сомонӣ кумак кардааст.

Гуфта мешавад, ки Субҳия Тоҳирзода аз ҷумлаи иштирокчиёни фаъоли Озмуни шаҳрии “Мисс Душанбе” буда, дар даври ниҳоӣ бо қарори доварон ғолиби номинатсияи “Мисс интеллект” гардид. Ба ӯ тоҷ ва 100 ҳазор сомонӣ мукофотпулӣ доданд, ки инак, нисфи онро ба кори хайр сарф намуд.

Иттилоъ дода мешавад, ки Мансур Нигматов ният дорад барои осебдидагони офати табиӣ дар Кӯлоб як миллион сомонӣ ҷамъоварӣ намояд ва то имрӯз наздики 400 ҳазор сомонӣ ҷамъ шудааст.

Ёдовар мешавем, ки пештар аз ин ғолиби номинатсияи “Мисс маҳбуби дилҳо”-и Озмуни шаҳрии “Мисс Душанбе” Сумая Раҷабзода мукофотпулиашро, ки 100 ҳазор сомониро ташкил медод, пурра ба мардуми зарардидаи Кӯлоб равон намуд.

Dialog.tj