Бахшида ба 35-солагии Истиқлолияти давлатии Ҷумҳурии Тоҷикистон Вазорати тандурустӣ ва ҳифзи иҷтимоии аҳолӣ озмуни ҷумҳуриявии “Табиби сол – 2026”-ро эълон кард.

Тавре ки маркази матбуоти Вазорати тандурустӣ ва ҳифзи иҷтимоии аҳолӣ хабар медиҳад, озмуни «Табиби сол – 2026» аз рӯи 35 самти соҳаи тиб баргузор гашта, ба ҳар кадом аз ихтисосҳои муайянгашта як нафар ҳамчун “Табиби сол-2026” муайян карда мешавад.

Манбаъ меафзояд, ки дар озмуни мазкур табибони муассисаҳои давлатии тиббӣ, табибони муассисаҳои хусусии тиббӣ, таҳлилгарони озмоишгоҳӣ, мутахассисони соҳаи тадқиқоти инструменталӣ, табибони муассисаҳои ҳифзи иҷтимоӣ, эпидемиологҳо, фарматсевтон, кормандони низоми ҳифзи ичтимоии аҳолӣ ва кормандони саҳроҳии ташкилотҳои ҷамъиятӣ иштирок карда метавонанд.

Гуфта мешавад, ки иштирокчиён бояд шаҳрвандии Ҷумҳурии Тоҷикистон, аз 26-сола боло, дорои ҳуҷҷатҳои тасдиқкунандаи тахассус бошанд ва мақолаи илмӣ омавии тиббӣ ва дастовардҳои касбӣ аз рӯйи ихтисос дар се соли охирашонро то 30-юми июни соли равон дар сомонаи озмун ҷой кунанд.

Маросими расмии ҷамъбасти озмун ва тақдими ҷоизаҳо моҳи сентябр доир гашта, ғолибон бо дипломи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва мукофоти пули дар ҳаҷми 15-ҳазор сомонӣ сарфароз гардонида мешаванд.

Dialog.tj