Нахустнамоиши филми муштараки Тоҷикистону Русия «Пайроҳаи хашм» дар кинотеатри «Тоҳир Собиров»-и Муассисаи давлатии «Тоҷикфилм» доир гардид.

Бинобар иттилои Маҳмадсаид Шоҳиён, директори Муассисаи давлатии «Тоҷикфилм», филми «Пайроҳаи хашм» оғози марҳилаи нави ҳамкориҳои эҷодӣ мебошад. Ба гуфтаи ӯ, ҳоло дар вилояти Суғд наворбардории филми муштараки дигар бо номи «Шабаҳе дар зулумот» идома дорад.

“Нахустнамоиши «Пайроҳаи хашм» бо истиқболи гарми тамошобинон рӯ ба рӯ шуда, ҳамчун як қадами муҳим дар роҳи рушди кинои тоҷик арзёбӣ гардид”, - омадааст дар иттилоияи маркази матбуоти “Тоҷикфилм”.

Ҳамчунин, гуфта мешавад, ки ҳоло як қатор филмҳои бадеиву таърихӣ, аз ҷумла «Моҳӣ барои Черчил», «Решаҳо», «Борбади Марвазӣ», «Робияи Балхӣ» ва «Теғи Сино» дар марҳилаҳои гуногуни таҳия қарор доранд.

Dialog.tj