Тибқи иттилои маркази матбуоти раиси вилояти Хатлон, шоми 1-уми май бар асари боридани борони шадид дар шаҳри Кӯлоб сел омада, бархе аз маҳаллаҳои шаҳр зери об монданд.

Манбаъ меафзояд, ки дар натиҷаи ин офати табиӣ ба баъзе роҳҳои дохилӣ, инфрасохтори шаҳрӣ ва қисме аз ҳудудҳои истиқоматӣ зарар расид.

Гуфта мешавад, ки бо мақсади шиносоӣ аз вазъи баамаломада ва андешидани чораҳои фаврӣ, раиси вилояти Хатлон Давлаталӣ Саид шабона ба маҳалли ҳодиса рафт.

"Зимни боздид ба роҳбарияти шаҳри Кӯлоб, сохторҳои марбута, кормандони хадамоти коммуналӣ, мақомоти ҳолатҳои фавқулода ва дигар масъулин барои ҳарчи зудтар бартараф намудани пайомадҳои офати табиӣ, тоза намудани роҳу кӯчаҳо, барқарорсозии ҳаракати нақлиёт ва расонидани кӯмак ба сокинони зарардида дастуру супоришҳои мушаххас дода шуд", - менависад манбаъ.

Иттилоъ дода мешавад, ки ҳоло  гурӯҳҳои корӣ ва техникаҳои махсус дар ҷойҳои зарардида фаъолият дошта, барои таъмини амният ва барқарор намудани шароити муътадили зиндагии сокинон чораҳои зарурӣ амалӣ карда мешаванд.

Dialog.tj