Эммануэл Макрон, раиси ҷумҳури Фаронса, эълом кардааст, ки кишвараш дар канори Лубнон истода ва аз талошҳо барои посух ба буҳрони инсонӣ ва таъмини ниёзҳои оворагон дар ин кишвар ҳимоят мекунад.

Макрон шаби сешанбе, 21-уми апрел, дар саҳифаи худ дар шабакаи иҷтимоии “Икс” навиштааст, ки Фаронса то кунун 90 тонна кумакҳои башардӯстона ба Лубнон ирсол карда ва дар рӯзҳои наздик тақрибан 10 тонна таҷҳизоти дигар низ интиқол хоҳад дод.

Ӯ ҳамчунин, гуфтааст, ки Фаронса дар ҳамкорӣ бо неруҳои муҳофизи сулҳи Созмони Милали Муттаҳид  талош дорад ҳимоятҳои башардӯстонаро дар ҷануби Лубнон тақвият кунад.

Раиси ҷумҳури Фаронса таъкид кардааст, ки авлавияти кунунӣ, устувор намудани оташбасе мебошад, ки ҳанӯз шикананда боқӣ мондааст.

Ба гуфтаи ӯ, суботи пойдор дар Лубнон ва минтақа ба як тавофуқи сиёсӣ миёни Лубнон ва Исроил вобаста аст: тавофуқе, ки амнияти ду тарафро тазмин кунад, тамомияти арзии Лубнонро ҳифз намояд ва заминаи одисозии равобитро фароҳам созад.

Макрон ҳамчунин, гуфтааст, ки ин раванд шомили таваққуфи ҳамлаҳо аз сӯи Ҳизбуллоҳ, хуруҷи неруҳои исроилӣ аз хоки Лубнон, халъи силоҳи Ҳизбуллоҳ бо ҳимояти ҷомеаи ҷаҳонӣ ва бозсозии Лубнон барои бозгашти оворагон хоҳад буд.

Ӯ таъкид кардааст, ки Фаронса ҳамвора дар лаҳзаҳои ҳассос дар канори Лубнон будааст ва ба ҳимоятҳои худ идома хоҳад дод.

Dialog.tj