Созмони байналмилалии муҳоҷират эълон кардааст, ки наздик ба 8 000 муҳоҷир дар соли 2025 дар саросари ҷаҳон ҳангоми талош барои расидан ба мақсад ҷони худро аз даст додаанд, ки афғонистониҳо ва роҳингиёҳо аз ҷумлаи қурбониёни асосӣ ба ҳисоб мераванд.

Мария Мойта, раиси бахши посухгӯии башардӯстона ва бозсозии ин ниҳод, рӯзи сешанбе, 21-уми апрел дар Женева ба хабарнигорон гуфтааст, ки ин омор нишондиҳандаи бад шудани вазъи ҷаҳон аст.

Ӯ афзудааст: “Бештари омори марг то кунун дар Осиё сабт шудааст, ки дар миёни қурбониён садҳо тан аз роҳингиёҳо ва афғонҳо шомил ҳастанд”.

Мойта гуфтааст, ки фишорҳои муҳоҷиратӣ коҳиш наёфтаанд, аммо масирҳо ба далели даргириҳо, тағйиротҳои иқлимӣ, ниёзҳои бозори кор ва тағйироти сиёсӣ тағйир кардаанд.

Дар ҳамин ҳол, Андреа Гарсия аз Созмони байналмилалии муҳоҷират гуфтааст, ки шумори сабтшуда дар соли гузашта дар муқоиса бо соли 2024 коҳиш ёфтааст: соле, ки дар он 9 ҳазору 197 мавриди марги муҳоҷирон дар сатҳи ҷаҳон сабт шуда буд.

Ӯ таъкид кардааст, ки коҳиши омор дар соли 2025 ҳатман ба маънои коҳиши воқеии маргҳо нест, балки аз камбуди иттилооти дастрас ва душвории тасдиқи бисёре аз ҳолатҳо бармеояд.

Гарсия афзудааст, ки ҳудуди 1 500 мавриди дигари марг ё нопадидшавӣ вуҷуд дорад, ки ин ниҳод бовар дорад рух додаанд, аммо ба далели набудани далелҳои кофӣ дар омори расмӣ шомил нашудаанд.

Пас аз тасаллути дубораи гурӯҳи террористии Толибон, шаҳрвандони Афғонистон маҷбур шудаанд ба муҳоҷирати ғайриқонунӣ ба кишварҳои дигар рӯ оваранд.

Dialog.tj