Хонандаи синфи 11-и МТМУ №40-и ноҳияи Фирдавсӣ Мардиктоев Раҳматулло як ҷавондухтарро, ки қасди худкушӣ дошт, наҷот дод.

Бинобар иттилои Раёсати Вазорати корҳои дохилӣ дар шаҳри Душанбе, шоми 19-уми апрел, тахминан соати 21:00 дар қисмати зери пули наздикии собиқ бозори «Султони Кабир» як ҷавондухтари сокини пойтахт бо нияти худкушӣ кардан худро ба дарёи Душанбе партофтааст.

Дар ин росто, Мардиктоев Раҳматулло, хонандаи синфи 11-и МТМУ №40-и ноҳияи Фирдавсӣ ба ҷавондухтар ёрии таъҷилӣ расонидааст. Ҷавондухтар аз об бароварда шуда, ба Муассисаи давлатии «Беморхонаи Истиқлол» интиқол дода шудааст.

Манбаъ меафзояд, ки мақомоти милитсияи пойтахт ба Мардиктоев Раҳматулло барои иҷрои қарзи шаҳрвандӣ ва наҷоти ҷавондухтар изҳори миннатдорӣ намуда, бо туҳфаҳои арзишманд қадрдонӣ карда мешавад.

Гуфта мешавад, ки вазъи саломатии ҷавондухтар таҳти назорати табибон қарор дошта, аз ҷониби мақомоти дахлдор санҷиши ҳолати мазкур идома дорад. Сабаби даст задан ба чунин амал муноқишаи оилавӣ арзёбӣ мегардад.

Dialog.tj