Муҳаммад Боқир Қолибоф, раиси Маҷлиси Шурои Исломии Эрон, иддаоҳои Доналд Трамп, раиси ҷумҳури Амрикоро инкор кард ва гуфт, ки бо дурӯғгӯӣ дар ҷанг пирӯзӣ ғайриимкон аст ва дар музокира низ роҳе ба ҷое нахоҳад бурд.

Ба гузориши расонаҳои Эрон Қолибоф имрӯз, 18-уми апрел дар шабакаи иҷтимоии “Икс” навишт: “Раиси ҷумҳури Амрико дар як соат ҳафт иддао матраҳ кард, ки ҳамаи онҳо дурӯғ аст”.

Раиси Маҷлиси Шурои Исломӣ таъкид кард: “Бо ин дурӯғгӯиҳо дар ҷанг пирӯз нашуданд ва ҳатман дар музокира ҳам роҳ ба ҷое нахоҳанд бурд”.

Вай ҳамчунин, бо баёни ин ки “бо идомаи муҳосира, тангаи Ҳурмуз боз нахоҳад монд” афзуд: “Убур ва мурур дар тангаи Ҳурмуз бар асоси “масири таъйиншуда” ва бо “иҷозатномаи Эрон” анҷом хоҳад шуд”.

Қолибоф хотирнишон кард: “Боз ё баста будани танга ва муқаррароти ҳоким бар онро майдон мушаххас мекунад, на шабакаҳои иҷтимоӣ”.

Раиси Маҷлиси Шурои Исломӣ дар бахши дигари паёми худ навишт: “Ҷанги расонаӣ ва муҳандисии афкори умумӣ бахши муҳимми ҷанг аст ва миллати Эрон таҳти таъсири ин тардастиҳо қарор намегирад. Ахбори воқеӣ ва дақиқи музокиротро дар мусоҳибаи ахири сухангӯи Вазорати хориҷа бихонед”.

Dialog.tj