Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ҳушдор дод, ки дар рӯзҳои оянда хокбориш ва омадани сел пешгӯӣ мегардад.

Тибқи иттилои манбаъ, 17-18-уми апрели соли ҷорӣ дар шаҳру ноҳияҳои шимолӣ ва марказии вилояти Суғд бо сабаби воридшавии хокбориш аз самти минтақаҳои шимолу ғарбӣ, баланд шудани ҳолати ифлосшавии ҳавои атмосферӣ аз моддаҳои муаллақ (чанг), зарачаҳои андозаашон 10мкр (Рм-10) ва зарачаҳои андозаашон 2,5мкр (Рм-2,5) пешгӯӣ мешавад.

Манбаъ меафзояд, ки 17-18-уми апрел бо сабаби ба амал омадани боришот, дар минтақаҳои доманакӯҳӣ ва кӯҳии ноҳияҳои тобеи ҷумҳурӣ, дар ноҳияҳои алоҳидаи вилояти Хатлон ва баъзе ноҳияҳои ғарбии Вилояти Мухтори Кӯҳистони Бадахшон сар задани селҳои хусусияти маҳаллидошта пешгӯӣ мегардад.

Ҳамчунин, таъкид мегардад, ки 17-уми апрел бо сабаби ба амал омадани боришот дар дарёҳои Вахш, Ёхсӯ, Қизилсӯ (ҷанубӣ) ва дарёҳои аз нишебиҳои ҷанубии қаторкӯҳҳои Ҳисор ҷоришаванда баландшавии сатҳи об аз эҳтимол дур нест.

Dialog.tj