Вазорати саноат ва тиҷорати гурӯҳи террористи  Толибон мегӯяд, ки сектори хусусии Афғонистон ва Ӯзбекистон тафоҳумномаи тиҷорӣ ба арзиши 520 миллион доллар имзо кардаанд.

Ин вазорат рӯзи душанбе, 13-уми апрел дар хабарномае гуфта, ки ин тафоҳумнома миёни сектори хусусии Афғонистон ва вилояти Андиҷони Ӯзбекистон имзо шудааст.

Бар асоси хабарнома, ин тафоҳумнома дар самтҳои таъсиси корхонаи оҳангудозӣ ва коркарди пахта, истеҳсоли семент дар Афғонистон, истеҳсоли тухми бордоршуда ва мурғҳои зотӣ дар ин кишвар, содироти ангишти Афғонистон ба Ӯзбекистон ва истеҳсоли қисмҳои эҳтиётии автомобилҳо ба имзо расидааст.

Ин тафоҳумномаҳо дар ҳузури Нуриддин Азизӣ, вазири саноат ва тиҷорати гурӯҳи террористии Толибон ва Шуҳратбек Абдураҳмонов, раиси вилояти Андиҷони Ӯзбекистон имзо шудааст.

Пеш аз ин низ сектори хусусии Ӯзбекистон ва Афғонистон тафоҳумномаи ҳамкорӣ ба арзиши беш аз 514 миллион доллар имзо карда буданд.

Dialog.tj