Раӽмидин Саломзода, муовини раиси шаӽри Душанбе, директори Муассисаи давлатии коммуналии «Душанбенақлиётхадамотрасон» Фирӯз Ғафурзода ва сардори Раёсати тандурустии шаҳри Душанбе Хушвахт Шарифзода аз ҳолати тозагагию санитарии воситаҳои нақлиёти мусофирбари пойтахт дидан карданд ва як қатор камбудиҳои ҷиддиро ошкор намуданд.

Тавре ки «Душанбенақлиётхадамотрасон» хабар медиҳад, муовини раиси шаҳри Душанбе дар робита ба камбудиҳои ҷойдошта ба роҳбарону масъулони корхона ва ҷамъиятҳои нақлиётии мусофирбари пойтахт супориш дода, иброз намуд, ки камбудиҳои ҷойдошта фавран бартараф карда шуда, ҳамарӯза қисмати дохилу беруни воситаҳои нақлиётро тоза карда ва раванди фаъолияти ронандагон дар хатсайрҳо пайваста мавриди назорати қатъӣ қарор дода шавад.

Ҳамчунин, иттилоъ дода мешавад, ки муовини раиси шаҳри Душанбе бо масъулин ва ронандагони нақлиёти мусофирбар ҷаласаи сайёр доир намуда, таъкид кардааст, ки бояд ҳар ронандаи нақлиёти мусофирбар ба сокинон ва меҳмонони пойтахт хизматрасонии хубу босифатро пешниҳод намоянд.  

“Таъкид гардид, ки ронандагонро мебояд, пеш аз ҳама одоби муошират, реҷаи ҳаракат, сару либосӣ тавсияшуда, экипировкаи муайянгардида, сабқат накардан, таъмини ҳаракати бонизом ва бехатари воситаҳои нақлиёти мусофирбар ва дигар талаботҳои мавҷудаи соҳаро қатъиян риоя намоянд, - омадааст дар иттилоияи «Душанбенақлиётхадамотрасон».

Dialog.tj