Муассисаи давлатии коммуналии “Душанбенақлиётхадамотрасон” бо нашри як муроҷиатнома аз сокинон ва меҳмонони пойтахт хост, ки аз хизматрасонии ронандагони воситаҳои нақлиётӣ ба таври ғайрирасмӣ (ба истилоҳ таксиҳои 10-сомона дар назар аст) истифода накунанд.

Манбаъ меафзояд, ки ин сокинону меҳмонон ба хотири пешгири намудани ҳодисаҳои роҳу нақлиёт аз хизматрасонии нақлиёти автомобилии кироякаш (таксӣ)-и рақами давлатии тагрангашон сабз ва рақами қайди иловагии тагрангаш зард истифода намоянд.

“Фаъолияти воситаҳои нақлиёти кироякаш (таксӣ)-и ширкатҳои нақлиётии шаҳри Душанбе  мутобиқ ба талаботҳои мавҷудаи соҳа  буда, пайваста ронандагони он аз муоинаи тиббӣ ва воситаҳои нақлиёт аз муоинаи техникӣ гузашта, доир ба таъмини бехатарии ронандагон ва мусофирон дар дохили воситаҳои нақлиёт камераҳои мушоҳидавӣ насб гардида, тавассути таҷҳизоти GPS раванди хизматрасонии ронандагон пайваста мавриди назорат қарор дорад”, - омадааст дар иттилоия.

Dialog.tj