Шоми гузашта дар варзишгоҳи марказии шаҳри Ҳисор дар доираи даври ниҳоии марҳилаи интихобии Ҷоми Осиё-2027 мунтахабҳои Тоҷикистон ва Филиппин рақобат карданд.

Бозӣ бо ҳисоби 1:1 ба анҷом расид ва тими миллии Тоҷикистон ба Ҷоми Осиё-2027 роҳхат гирифт. Аммо бояд гуфт, ки футболбозони тоҷик натавонистанд бозии беҳтарини худро нишон диҳанд, балки дар ҳама мавқеъҳо камбудиҳои назаррас ба чашм мерасид. Хусусан, дар 10 дақиқаи охир ҳамватанони мо танҳо дар ҳимоя нишастанд ва кӯшиш карданд, ки ҳариф гол назанад.

Ёдовар мешавем, ки дар марҳилаи интихобии Ҷоми Осиё-2027, 24 даста ба 6 гурӯҳ, ки ҳар кадом аз чор даста иборат буданд, рақобат карданд ва танҳо ғолибони гурӯҳҳо ба қисми ниҳоии мусобиқа роҳ ёфтанд.

Гуфта мешавад, ки Ҷоми Осиё-2027 аз 15-уми январ то 8-уми феврали соли 2027 дар Арабистони Саудӣ баргузор мегардад.

Dialog.tj