Владимир Зеленский, президенти Украина эълом кардааст, ки сафараш ба кишварҳои Ховари Миёна муваффақ будааст ва чандин тавофуқ дар заминаи ҳамкориҳои амниятӣ ба даст омада ё дар ҳоли баррасӣ аст.

Рейтерз шаби душанбе, 30-уми март гузориш дода, ки Зеленский пас аз бозгашт ба Киев гуфтааст ин тавофуқҳо бо Арабистони Саудӣ, Амороти Муттаҳидаи Арабӣ ва Қатар ҳосил шудаанд.

Ба гуфтаи ӯ, Украина ҳамчунон бо Урдун ва Кувайт дар ҳоли ҳамкорӣ аст ва Баҳрайн ва Умон низ алоқамандии худро барои ҳамкорӣ нишон додаанд.

Бар асоси гузориш, Зеленский дар ин сафар талош кардааст таҷрибаи Украина дар муқобила бо ҳамлаҳои тайёраҳои бидуни сарнишинро бо кишварҳои минтақа ошно созад.

Ӯ гуфтааст, ки Украина дар канори содироти системаҳои дифоӣ ва маҳоратҳои низомӣ, интизори ҳамкории мутақобил дар бахшҳои амниятӣ, дифои ҳавоӣ ва энержӣ аст.

Зеленский ҳамчунон таъкид кардааст, ки фурӯши силоҳ бояд дар сатҳи давлатҳо анҷом шавад ва ширкатҳо набояд ба гунаи мустақим вориди муомилот шаванд.

Гуфтанист, ки президенти Украина дар ҷараёни ин сафар дар бораи таъмини сӯзишвории дизел, ки барои бахшҳои дифоӣ ва кишоварзии ин кишвар ҳаётӣ аст, низ гуфтугӯ кардааст.

Dialog.tj