Имрӯз, 27-уми март дар доираи Бозиҳои Делфӣ аз рӯи ҳамаи номинатсияҳо даври дуюми озмун баргузор гардид.

Бинобар иттилои Вазорати фарҳанги кишвар, ҳайати мунтахаби Ҷумҳурии Тоҷикистон дар ин марҳилаи озмун ҳунару маҳорати баланд нишон дода, сазовори 1 медали тилло, 1 медали нуқра, 4 медали биринҷӣ ва 4 дипломи махсус шуданд.

“Ин муваффақиятҳо натиҷаи заҳмати пайваста, омодагии ҷиддӣ ва истеъдоди баланди иштирокчиёни тоҷик буда, обрӯ ва нуфузи фарҳангии Тоҷикистонро дар сатҳи байналмилалӣ боз ҳам боло мебардоранд”, - зикр мекунад манбаъ.

Манбаъ меафзояд, ки ҳайати Ҷумҳурии Тоҷикистон дар ин чорабинии бонуфуз дар номинатсияҳои гуногун, аз ҷумла навозандагии асбобҳои мардумӣ, фортепиано, сурудхонии мардумӣ, сурудхонии эстрадӣ, санъати тасвирӣ ва ҳунарҳои мардумӣ маҳорати худро муаррифӣ карданд.

Гуфта мешавад, ки Бозиҳои Делфӣ яке аз муҳимтарин чорабиниҳои фарҳангии байналмилалӣ ба ҳисоб меравад. Ин рӯйдоди муҳими фарҳангӣ намояндагони ҷавону боистеъдодро аз кишварҳои гуногун гирд оварда, барои рушди санъат ва табодули фарҳангӣ шароити мусоид фароҳам месозад.

Dialog.tj