Раёсати Вазорати корҳои дохилӣ дар шаҳри Душанбе бо нашри як муроҷиат аз волидон хост, ки кӯдаконро дар рӯзи таҷлили Иди Рамазон дуру дароз беназорат нагузоранд.

Манбаъ меафзояд, ки аз сабаби беназоратӣ ва камасъулиятии баъзе аз волидон дар рӯзҳои иду ҷашнҳо, махсусан Иди Рамазон ва Иди Қурбон, содиршавии садамаҳои нақлиётӣ, бедаракшавии кӯдакон ва дигар қонуншиканиҳо бо иштироки наврасон ба қайд гирифта мешаванд.

“Раёсати Вазорати корҳои дохилӣ дар шаҳри Душанбе, бо мақсади таъмини бехатарии кӯдакон ва пешгирии ҳодисаҳои нохӯш бо иштироки ноболиғон, аз волидони наврасон хоҳиш менамояд, ки дар рӯзи таҷлили Иди Рамазон кӯдаконро дуру дароз беназорат нагузоранд. Аз беҳудагардӣ ва шабгардию оворагардии кӯдакон пешгирӣ намуда, онҳоро ба иҷрои амалҳои муфид сафарбар созанд”, - зикр мегардад дар муроҷиати милитсияи пойтахт.

Ҳамчунин, таъкид мегардад, ки дар сурати аз ҷониби ноболиғон содир гардидани ҳуқуқвайронкунӣ, барои беэътиноӣ ва иҷро накардани уҳдадориҳои тарбиявӣ нисбат ба волидон ё шахсони онҳоро ивазкунанда тибқи талаботи қонунгузорӣ чораҳои дахлдори қонунӣ андешида мешавад.

Dialog.tj