Раёсати Вазорати корҳои дохилӣ дар шаҳри Душанбе ду ноболиғро барои ба оворагардиву талбандагӣ машғул шудан аз тарбияи волидон гирифта, ба Муассисаи таҳсилоти миёнаи умумии «Мактаб-интернати №1 барои кӯдакони ятиму бепарастор»-и шаҳри Душанбе супурд.

Тавре ки иттилоъ дода мешавад, борҳо аз ҷониби кормандони Шуъбаи огоҳонӣ ва пешгирии ҳуқуқвайронкунӣ байни ноболиғон ва ҷавонони Раёсати ВКД дар шаҳри Душанбе ду ноболиғи 12-солаи пойтахт барои машғул шудан ба оворагардӣ ва талбандагӣ ба шуъбаҳои милитсия дастрас гардида буданд. Инчунин, бо мақсади фаро гирифтани ноболиғон ба таҳсилу тарбия ва муҳайё намудани шароити мусоид барои рушду камоли онҳо волидонашон чанд маротиба огоҳонида шуда буданд, вале дар иҷрои уҳдадориҳои падару модарӣ саҳлангорӣ намуда, кӯдакони хурдсолро ба машғул шудан ба оворагардӣ ва талбандагӣ водор сохта, маблағҳои аз ин роҳ бадастовардаро ба манфиати шахсии худ истифода мебурдаанд.

Иттилоъ дода мешавад, ки бо Қарори Суди ноҳияи Синои шаҳри Душанбе кӯдакон аз тарбияи падару модар гирифта шуда, ба Муассисаи таҳсилоти миёнаи умумии «Мактаб-интернати №1 барои кӯдакони ятиму бепарастор»-и шаҳри Душанбе ҷойгир гардиданд.

Dialog.tj