Бинобар иттилои шуъбаи рушди сайёҳии Мақомоти иҷроияи ҳокимияти давлатии шаҳри Душанбе, 4-уми апрели соли равон дар муассисаи давлатии «Наврӯзгоҳ» чорабинии фарҳангӣ-фароғатии «Dushanbe Navruz Fest» баргузор мешавад.

Иттилоъ дода мешавад, ки чорабинӣ аз соати 15:00 то 22:00 идома ёфта, силсилаи чорабиниҳои ҷолиби фарҳангӣ ва фароғатиро дар бар мегирад. Аз ҷумла, баргузории шоу-консерти идона бо иштироки сарояндагони маъруфи ватанӣ ва ҳунармандони хориҷӣ, намоиш ва фурӯши маҳсулоти ҳунарҳои мардумӣ, пешниҳоди таомҳои миллӣ ва хӯришҳои гуногун, шириниҳо ва нӯшокиҳои ташнашикан пешбинӣ гардидааст.

Гуфта мешавад, ки ҳадафи асосии баргузории чорабинии мазкур фароҳам овардани фазои идона ва шароити мусоид барои истироҳату фароғати сокинони пойтахт, меҳмонон ва сайёҳон, инчунин, муаррифии шаҳри Душанбе ҳамчун маркази муосири фарҳангӣ ва дорои имконияти васеи сайёҳӣ мебошад.

Dialog.tj