Дар асоси қарори раиси шаҳри Душанбе Рустами Эмомалӣ мусобиқаи кушоди варзишӣ оид ба волейболи касбӣ ва ғайрикасбӣ байни бонувони вазорату идораҳо ва ташкилоту муассисаҳо, барои дарёфти «Ҷоми Раиси шаҳри Душанбе» баргузор гардид.

Тавре ки маркази матбуоти Мақомоти иҷроияи ҳокимияти давлатии шаҳри Душанбе иттилоъ медиҳад, мусобиқаи мазкур аз 14-уми феврал то 10-уми марти соли равон дар мактаби махсуси варзишии захираҳои олимпии №5 оид ба бозиҳои варзишии шаҳри Душанбе доир шуд.

Гуфта мешавад, ки дар мусобиқаи мазкур 40 даста бо фарогирии 600 нафар аз вазорату кумитаҳо, раёсат ва ташкилоту муассисаҳо, инчунин, дастаҳои бонувони вилоятҳои Мухтори Кӯҳистони Бадахшон, Суғду Хатлон, шаҳру ноҳияҳои тобеи ҷумҳурӣ ва шаҳри Душанбе иштирок намуданд.

Ҳамин тариқ, миёни бонувони ғайрикасбӣ дастаи Вазорати корҳои дохилии Ҷумҳурии Тоҷикистон сазовори ҷойи якум, дастаи Сарраёсати маорифи шаҳри Душанбе сазовори ҷойи дуюм ва дастаи Раёсати тандурустии шаҳри Душанбе сазовори ҷойи сеюм гардиданд. Дар байни дастаҳои касбӣ бошад, дастаи бонувони шаҳри Душанбе-1 ҷойи якум, дастаи Вилояти Мухтори Кӯҳистони Бадахшон сазовари ҷойи дуюм, дастаи вилояти Суғд сазовори ҷойи сеюм ва дастаи Душанбе-2 ба гирифтани ҷойи чорум ноил шуданд.

Дар маросими ҷамъбасти озмун аз ҳисоби буҷети шаҳри Душанбе ба ғолибон медал, диплом ва мукофоти пулӣ тақдим гардид. Иттилоъ дода мешавад, ки ба ҷойҳои якум 18170 сомонӣ, ҷойҳои дуюм 15620 сомонӣ, ҷойҳои сеюм 10520 сомонӣ ва ҷойҳои чорум диплом ва мукофоти пулӣ дар ҳаҷми 5000 сомонӣ дода шуд.

Dialog.tj