Тавре ки аз Институти астрофизикаи Академияи миллии илмҳои Тоҷикистон иттилоъ дода мешавад, мувофиқи ҳисобҳои астрономӣ имсол Наврӯз рӯзи 20-уми марти соли 2026, соати 19:45:53 ба вақти Душанбе фаро мерасад.

“Маҳз дар ҳамин лаҳза маркази қурси Офтоб дар ҳаракати зоҳирии худ аз нимкураи ҷанубии осмон ба нимкураи шимолӣ мегузарад ва нуқтаи буриши масири Офтоб (эклиптика, доират-у-лбуруҷ) ва хати истивои осмон (экватор)-ро нуқтаи эътидоли баҳорӣ меноманд”, - зикр мегардад дар хабарнома.

Ёдовар мешавем, ки 22-уми март дар Муассисаи давлатии «Боғи Ирам» бо ташаббуси Мақомоти иҷроияи ҳокимияти давлатии шаҳри Душанбе ва Кумитаи рушди сайёҳии назди Ҳукумати Ҷумҳурии Тоҷикистон Фестивали байналмилалии «Наврӯз-мероси фарҳангию ҷаҳонгардӣ» доир мегардад. Дар доираи фестивали мазкур намоиши ҳунарҳои мардумӣ, ойинҳои наврӯзӣ, бозиҳои миллии варзишӣ, пухтани таомҳои наврӯзӣ, либоси миллӣ ва имконияти хизматрасонии сайёҳӣ ба нақша гирифта шудааст.

Dialog.tj