Як коршинос оид ба асирони фаластинӣ, шиканҷаи онҳо дар зиндонҳои Исроилро сиёсати барномарезишуда донист, ки ба ҳадафи шикастани иродаи асирон ва интиқом аз онҳо анҷом мешавад.

Ба гузориши хабаргузории “Шаҳоб”, Мунқиз Абуатвон, коршиноси умури асирони фаластинӣ гуфт: “Ишғолгарон бо фикри ошкори интиқомҷӯёна бо асирони фаластинӣ бархӯрд мекунанд, ки нишондиҳандаи як сиёсати ҳадафманд бо мақсади шикастани ирода ва таҳмили дард ва ранҷ бар онҳост”.

Абуатвон баён кардааст: “Ишғолгарон асирони фаластиниро масъули амалиёти “Тӯфони Ақсо” дар 7-уми октябри соли 2023 медонанд ва дар натиҷа онҳоро ба усулҳои мухталиф таҳти шиканҷа қарор медиҳанд, ки шомили саркӯб, озору азият ва шиканҷаи ҷисмонӣ ва равонӣ дар зиндонҳо ва боздоштгоҳҳо, латукӯби шадид бо чӯбдаст, дастбанд задани тӯлонӣ ва маҷбур кардани асирон ба роҳ рафтан дар ҳавлии зиндон дар ҳоле ки поҳояшон ба занҷир баста шудааст, мебошад”.

Абуатвон таъкид кард: “Асирони фаластинӣ дар зиндонҳои Исроил аз асоситарин ҳуқуқи мазҳабии худ маҳрум ҳастанд ва ба далели қатъи иртибот бо ҷаҳони хориҷ ва набуди расонаҳо, аз оғози моҳи Рамазон бехабар мондаанд”.

Вай афзуд: “Идораи зиндонҳои Исроил аз ироаи ҳар гуна иттилоъ марбут ба муносибатҳои мазҳабӣ ба зиндониён худдорӣ мекунад, ки ин амр ранҷи равонии онҳоро зиёд кардааст”.

Ин коршиноси умури асирон баён кард: “Ончи дар зиндонҳои Нақаб, Уфер, Нафҳа ва Рамон, илова бар марказҳои боздошти зиндониёни Навори Ғазза иттифоқ меафтад, як воқеияти талх ва шармовар аст”.

Вай ба истифода аз равишҳои ғайриинсонӣ дар бархӯрд бо зиндониён, ба вижа зиндониёни Ғазза ишора карда ва эълом дошт: “Нигарониҳои рӯзафзуне аз вуқуи қатл ё эъдом дар дохили марказҳои боздошт бидуни эъломи расмӣ вуҷуд дорад”.

Абуатвон баён кард: “Иқдомҳои ишғолгарон маҳдуд ба шиканҷаи ҷисмонӣ нест, балки ба шиканҷаи равонӣ низ густариш меёбад ва ин аз тариқи ироаи ахбори дурӯғин дар бораи шаҳодати бастагон ё тахриби хонаҳояшон ба асирон сурат мегирад”.

Ӯ ба авҷи бемориҳои пӯстии миёни асирони фаластинӣ ишора карда ва гуфт: “Ишғолгарон дар ҳоли азнавгирии тасмимҳое бо ҳадафи зиёд кардани маҳдудиятҳо барои асирон ва маҳрум кардани онҳо аз ҳуқуқи ибтидоии худ ҳастанд. Ин иттифоқ дар миёни сукути нигаронкунандаи байналмилалӣ рух медиҳад”.

Абуатвон аз нақши созмонҳои байналмилалии ҳуқуқи башар, ба вижа Кумитаи байналмилалии Салиби Сурх интиқод кард ва гуфт: “Онҳо аз 7-уми октябр ҳеч боздиде аз зиндониён анҷом надодаанд, бо вуҷуди он ки аз маргҳои мустанад дар зиндонҳо огоҳ будаанд. Вазъияти асирони фаластинӣ нишондиҳандаи сиёсати интиқомҷӯёнаи пайвастаи Исроил аст ва ҷомеаи байналмилалӣ бояд барои муҳофизат аз ҷони асирон ва ҳимояи ҳуқуқи ибтидоии инсонии онҳо иқдоми фаврӣ анҷом диҳад”.

Dialog.tj