Тибқи иттилои рӯзномаи “Садои мардум” муассисаи таҳсилоти миёнаи умумии №150-и деҳаи Баҳори шаҳри Ваҳдат ба номи сарбози шаҳидшудаи Қӯшунҳои сарҳадии КДАМ Олимҷон Бутаев гузошта шуд.

Манбаъ менависад, ки дар арафаи таҷлили 33-солагии таъсиси Қувваҳои Мусаллаҳи Ҷумҳурии Тоҷикистон ва гиромидошти хотираи шаҳидони роҳи Ватан дар муассисаи мазкур чорабинии тантанавӣ низ баргузор гардид.

“Дар чорабинӣ аз ҷасорати ватандӯстонаи ин ҷавонмарди тоҷик, ки баҳри ҳимояи Ватан ҷон додааст, сухан гуфта, руҳи шикастнопазири ӯро пос доштанд. Таъкид шуд, ки Олимҷон Бутаев фарзанди ҷонфидо, ватандӯст ва ифтихори ҳар яки мост”, - омадааст дар матлаби рӯзномаи мазкур.

Иттилоъ дода мешавад, ки Олимҷон Бутаев 16-уми ноябри соли 2002 дар деҳаи Мачитони деҳоти Баҳори шаҳри Ваҳдат таваллуд шуда, пас аз хатми мактаби миёна ба сафи Қувваҳои Мусаллаҳи Ҷумҳурии Тоҷикистон пайваста, 16-уми сентябри соли 2022 зимни муноқишаҳои сарҳадӣ барои ҳифзи хоки Ватан шаҳид шуда буд.

Dialog.tj