Тавре ки маркази матбуоти Вазорати маориф ва илми Ҷумҳурии Тоҷикистон хабар медиҳад, 19-уми феврал дар Вазорати маориф ва илми Ҷумҳурии Тоҷикистон таҳти раёсати муовини сарвазири Ҷумҳурии Тоҷикистон Дилрабо Мансурӣ ҷаласаи кории ҳайати комиссияи ҷумҳуриявии Озмуни «Шоҳномахонӣ» баргузор гардид. 

Манбаъ меафзояд, ки муовини сарвазири кишвар Дилрабо Мансурӣ таъкид намуд, ки баргузории Озмуни ҷумҳуриявии «Шоҳномахонӣ» иқдоми муҳим дар роҳи эҳёи суннатҳои асили миллӣ буда, омӯзиши «Шоҳнома» на танҳо шиносоӣ бо таъриху фарҳанги ниёгон, балки василаи муассири тарбияи насли худшиносу ватандӯст мебошад.

Иттилоъ дода мешавад, ки дар ҷаласа ҷадвали баргузории чор даври озмун барои соли 2026 мавриди баррасӣ қарор гирифта, ҳамин тартиб, даври якум моҳи март, даври дуюм моҳи апрел, даври сеюм нимаи дуюми моҳи сентябр ва даври чорум нимаи якуми моҳи декабр баргузор мегардад.

Дар ҷаласа таъкид гардид, ки озмуни мазкур на танҳо воситаи кашфи истеъдодҳои нав дар бахши қироат ва суханварист, балки омили муҳими баланд бардоштани сатҳи маънавиёт, ифтихори ватандорӣ ва эҳсоси худогоҳии миллӣ дар ҷомеа ба шумор меравад.

Dialog.tj