Раиси Маҷлиси миллии Маҷлиси Олии Ҷумҳурии Тоҷикистон ва раиси шаҳри Душанбе Рустами Эмомалӣ ба муносибати фарорасии моҳи шарифи Рамазон сокинони кишварро табрик кард.

“Моҳи шарифи Рамазон моҳи нуру маърифат, сабру таҳаммул ва худшиносиву покизагии рӯҳу равон аст. Ин айёми муборак қалбҳоро ба ҳам наздик месозад, моро ба накӯкорӣ, меҳрубонӣ ва дастгирии якдигар раҳнамун месозад”, - зикр мешавад дар паёми табрикотии раиси шаҳри Душанбе.

Рустами Эмомалӣ таъкид мекунад, ки мардуми тоҷик дар партави сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон арзишҳои волои инсондӯстӣ, таҳаммулпазирӣ ва ваҳдати миллиро пос медоранд. Моҳи Рамазон беҳтарин фурсатест, ки ин арзишҳоро таҳким бахшида, ба хотири ободии Ватани азизамон ва пешрафти давлат саъю талош намоем.

“Бо орзуи амалӣ гардидани ниятҳои неку ормонҳои созанда, фарорасии моҳи шарифи Рамазонро бори дигар ба сокинони кишвар ва ҳамватанони бурунарзиамон табрик гуфта, ба ҳар яки шумо сиҳатмандӣ, рӯзгори пурфайз ва сарбаландӣ таманно дорам”, - афзуда мешавад дар паёми табрикотии шаҳрдор.

Dialog.tj