Барномаи рушди Созмони Милал (UNDP) эълом кардааст, ки занони Афғонистон бо вуҷуди маҳдудиятҳои густарда, ҳамчунон мехоҳанд кор кунанд ва талош доранд бо эҷоди касбу кор аз хонаводаҳои худ ҳимоят кунанд.

Ин созмон рӯзи душанбе, 16-уми феврал гузориш додааст, ки баррасиҳои анҷомшуда нишон медиҳад занони Афғонистон дар шароити душвор низ хостори ҳимоят барои эҷод ё густариши фаъолиятҳои иқтисодии худ ҳастанд.

Созмони Милал афзуда, ки ин хостаҳо бо барномаҳои ин ниҳод барои тавонмандсозии иқтисодии занон ва эҷоди фурсатҳои баробар ҳамсӯ аст ва нишон медиҳад иштироки иқтисодии занон ҳамчунон зарфияти болое барои рушд дорад.

Дар гузориш таъкид шудааст, ки намунаҳои муваффақи корофаринии занон, баёнгари он аст, ки сармоягузорӣ ва ҳимоятҳои ҳадафманд метавонад дониш ва маҳоратҳои маҳаллиро ба фаъолиятҳои иқтисодии пойдор табдил кунад.

Барномаи рушди Созмони Милал гуфтааст, ки идомаи ин раванд метавонад сабаби афзоиши касбу кор, тақвияти оромиши хонаводаҳо ва рушди иқтисодӣ дар сатҳи ҷомеа шавад.

Dialog.tj