Тибқи иттилои Вазорати маориф ва илми Ҷумҳурии Тоҷикистон, дар соли 2025-ум 95 номгӯй китоби дарсӣ бо теъдоди 6 миллиону 316 ҳазор нусха ба анбори китобҳои дарсӣ ворид гардид.

Ба иттилои манбаъ, дар умум давоми соли гузашта ба анбори китобҳои дарсии вазорат 8 миллиону 681 ҳазору 310 нусха китоби дарсӣ ва маводи таълимӣ ворид гардид, ки 94,8 фоизи нақшаи пешбинишударо ташкил медиҳад.

Гуфта мешавад, ки соли сипаригардида 118 номгӯй китоби дарсӣ бо теъдоди 8 миллиону 51 ҳазор нусха аз озмуни чоп гузаштанд.

Ҳамчунин, таъкид мегардад, ки бо қарори ҳайати мушовараи Вазорати маориф ва илми Ҷумҳурии Тоҷикистон дастхати 28 номгӯй китоби дарсӣ, 9 номгӯй дастури таълимию методӣ барои хонандагони муассисаҳои таҳсилоти умумӣ ва 151 номгӯй китоби дарсӣ барои муассисаҳои таҳсилоти олии касбӣ ба нашр тавсия гардидааст. Бори нахустин аст, ки қариб 9 миллион нусха китоби дарсӣ дар як сол чоп мешавад.

Ҳамчунин, иттилоъ дода мешавад, ки дар давраи ҳисоботӣ ба раёсату шуъбаҳои маорифи шаҳру ноҳияҳои ҷумҳурӣ ва муассисаҳои дигари таълимӣ (гимназияву литсейҳо барои хонандагони болаёқат, муассисаҳои таҳсилоти ибтидоӣ, миёна ва олии касбӣ) 7 миллиону 150 ҳазору 889 нусха китоби дарсӣ ва маводи таълимӣ дастрас карда шуд.

Dialog.tj