Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба сабти овозие, ки чандест дар паёмрасони Вотсап дар гардиш аст, вокуниш кард.

Бояд гуфт, ки дар паёмрасони Вотсап сабти овозие паҳн шудааст, ки зане иддао мекунад, ки гуё як гурӯҳ худро табиб гуфта, бо либосу лавозимоти тиббӣ ва бо баҳонаҳои санҷидани вазъи саломатии шаҳрвандон хона ба хона гашта, бо ин роҳ кадом бемории сироятро паҳн мекунанд.

Дар ин росто, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вокуниш кард ва гуфт, ки хабари мазкур асоси воқеӣ надошта, дар кишвар ҳеҷ гурӯҳи номаълуми табибон фаъолият намекунад.

“Паҳн гаштани чунин овозаву ҳангомаҳои бардурӯғ танҳо бо мақсади дар таҳлука афтонидани шаҳрвандон аз ҷониби афроди ғаразнок ва манфиатҷӯ мебошад”, - навиштааст маркази матбуоти вазорат.

Манбаъ меафзояд, ки табибони оилавии муассисаҳои кумаки аввалияи тиббию санитарии кишвар тибқи тартиби муқарраргардида баҳри гузаронидани иммунизатсия, назорати занони ҳомила ва дигар корҳои ба фаъолияташон алоқаманд дар минтақаҳои барояшон вобастагашта хона ба хона мегарданд.

Ҳамчунин, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таъкид мекунад, ки шаҳрвандон ба чунин хабару овозаҳои бардурӯғ бовар накунанд.

Dialog.tj