Раёсати Вазорати корҳои дохилӣ дар шаҳри Душанбе аз пешгирии ҷинояти авбошӣ миёни ноболиғон хабар дод.

Тавре ки манбаъ менависад, кормандони самти кор бо ноболиғони ШВКД-1 дар ноҳияи Шоҳмансур дар натиҷаи санҷишҳои фаврӣ аз содир гардидани ҷинояти авбошӣ байни ноболиғон пешгирӣ намуданд.

Афзуда мешавад, ки "дар асоси хабари расида, шоми 19-уми январи сори ҷорӣ як гурӯҳ ноболиғони мусаллаҳ бо предметҳои халандаю бурранда, дар кӯчаи С.Айнӣ ҷамъ шуда, мехостанд бо ҳамдигар муноқиша намоянд. Кормандони милитсия, дар ҷойи ҳодиса 6  ноболиғро дастгир намуданд. Зимни кофтуков аз онҳо ду адад корди гуногунтамға дарёфт ва мусодира карда шуд".

Гуфта мешавад, ки дар баробари баргузории корҳои фаҳмондадиҳӣ, ҳамзамон, нисбати волидони ноболиғон тибқи талаботи моддаи 90 КҲМ Ҷумҳурии Тоҷикистон, протоколи маъмурӣ тартиб гардид.

Dialog.tj