Агентии Тоҷикстандарт ба сокинони кишвар ҳушдор медиҳад, ки ҳангоми харидорӣ ва истифодаи маҳсулоти консервашуда бо диққат бошанд, зеро дар ҳолати вайрон будани ин гуна маҳсулот имкони заҳролудшавӣ, ҳатто ба ботулиз гирифтор гардидан аст.

“Таҳлилҳо нишон медиҳанд, ки сабаби заҳролудшавии одамон ин истеъмоли хӯришҳои консервашуда, аз он ҷумла дар шароити хона тайёр гардидаанд, мебошанд. Ҳамчунин, асоси рӯй додани ин ҳолат ҳангоми омода намудани маҳсулот риоя нагаштани талаботи беҳдоштӣ ва ҳуҷҷатҳои меъёрии техникӣ мебошад”, - омадааст дар иттилоияи Агентии Тоҷикстандарт.

Ҳамчунин, Агентии Тоҷикстандарт тавсия медиҳад, ки барои пешгирӣ аз заҳролудшавӣ сокинон танҳо консерваҳои бо тамға ва дорои санаи истеҳсолро харидорӣ намоянд, консерваҳоро дар ҷойи хунук ва хушк нигоҳ доранд ва пеш аз истифода бубинанд, ки агар кафк карда бошад, аз истеъмол худдорӣ кунанд.

Dialog.tj