Бино бар иттилои Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон, даромади буҷети суғуртаи иҷтимоӣ ва нафақа ба ҳолати 31-уми декабри соли гузашта панҷ миллиарду 526,6 миллион сомонӣ пешбинӣ гардида, 109 фоиз таъмин шудааст.

Манбаъ меафзояд, ки дар ҳамин ҳол ба буҷети Агентии суғуртаи иҷтимоӣ ва нафақа беш аз шаш миллиард сомонӣ ворид гардид, ки назар ба соли 2024 як миллиарду 109,9 миллион сомонӣ бештар мебошад.

Иттилоъ дода мешавад, ки ба ҳолати якуми январи соли равон шумораи умумии нафақагирон 877 206 нафарро ташкил менамояд, ки афзоиши шумораи онҳо нисбат ба ҳамин давраи соли гузашта 40 516 нафар (4,8 дарсад) мебошад.

Гуфта мешавад, ки аз моҳи сентябри соли гузашта нафақаи 847 ҳазор нафақагир зиёд шудааст. Аз ин шумора, 346,5 ҳазор нафақаи суғуртавӣ, 272,7 ҳазор нафақаи меҳнатӣ ва 227,8 ҳазор нафақаи иҷтимоӣ мегирифтаанд.

Ҳамчунин, бояд гуфт, ки имсол ҳам нафақаҳои суғуртавӣ, меҳнатӣ ва иҷтимоӣ, инчунин иловапулӣ ба онҳо тибқи муқаррароти моддаи 51 Қонуни Ҷумҳурии Тоҷикистон «Дар бораи нафақаҳои суғуртавӣ ва давлатӣ» ва андозаи нафақаи заминавӣ дар сатҳи таварруми соли 2025, вале на кам аз 15 фоиз аз андозаи муқарраршудаашон индексатсия (зиёд) карда мешавад.

Dialog.tj