Раёсати Вазорати корҳои дохилӣ дар шаҳри Душанбе хабар дод, ки дар як шабонарӯзи гузашта ду ҳолати ба фолбинӣ машғул шуданро ошкор намуд.

Гуфта мешавад, ки кормандони Шуъбачаи сайёҳии милитсияи пойтахт зимни машғул шудан ба фолбинӣ шаҳрванд Шуляк Тамара, сокини 63-солаи шаҳри Душанберо дастгир намуданд.

Ба навиштаи манбаъ, номбурда муддати тулонӣ ин амали нангинро пешаи худ намуда, онро василаи ба даст овардани манфиати молиявӣ табдил додааст.

Манбаъ меафзояд, ки ҳамчунин, кормандони ШВКД-1 дар ноҳияи Фирдавсӣ шаҳрванд Алмамадов Гулмамадро ҳангоми машғул шудан ба фолбинӣ дастгир намуданд.

Иттилоъ дода мешавад, ки нисбат ба номбурдагон бо моддаи 482 Кодекси ҳуқуқвайронкунии маъмурии Ҷумҳурии Тоҷикистон протоколи маъмурӣ тартиб дода шуда, нисбати ҳар кадоме ҷаримаи маъмурӣ ба андозаи 80 нишондиҳанда барои ҳисобҳо, баробар ба 6 ҳазор сомонӣ таъин карда шуд.

Dialog.tj