Дар Муассисаи давлатии “Маркази ҷумҳуриявии илмии ҷарроҳии дилу рагҳо”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба як бемор бори аввал дар Ҷумҳурии Тоҷикистон ду стенти худкушодаи металлӣ гузошта шудааст.

Тавре ки маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар медиҳад, бемор бо шикоятҳои зардшавии луобпардаҳо ва склера, ранги пешоб сурхчатоб, дилбеҳузурӣ, қайкунӣ ва заъфи умумӣ ба маркази мазкур муроҷиат кардааст.

Гуфта мешавад, ки ташхис дар бемор омоси сараки ғадуди зери меъда, ки ба дувоздаҳангушта ва меъда паҳн мешавад, инчунин, зардшавии механики ва стенози декомпенсатсияшудаи пилорикиро нишон додааст.

“Ҳамин тавр, ба бемор ҷарроҳӣ бо истифода аз холангиопанкреатографияи ретроградии эндоскопӣ (ERCP) ва папиллосфинктеротомияи эндоскопӣ бо гузоштани стенти худкушодаи металлии нитинол, ки дарозии 8 см ва диаметри 1 см дорад, ба роҳҳои сафро гузаронида шуд. Аз сабаби стенози шадиди пайванди меъда ва дувоздаҳангушта, ба бемор иловатан стенти худкушодаи металлии нитинол бо дарозии 12 см ва диаметри 22 мм низ гузошта шуд”, - омадааст дар иттилоияи вазорат.

Иттилоъ дода мешавад, ки ҷарроҳиро Сорбон Мусоев, номзади илмҳои тиб, мудири шӯъбаи ташхис ва табобати маркази мазкур иҷро карда, ҳоло ҳолати бемор хуб буда, дар муддати кӯтоҳ ба хона рухсат дода хоҳад шуд.

Dialog.tj