Раёсати Вазорати корҳои дохилӣ дар шаҳри Душанбе аз боздошти сарояндаи шинохтаи тоҷик Фирӯза Ҳафизова хабар дод.

Бинрбар гузориши манбаъ, Фирӯза Ҳафизова барои беэҳтиромӣ кардан нисбат ба пули миллӣ боздошт гардидааст.

Дар наворе, ки Раёсати ВКД дар шаҳри Душанбе нашр кард, гуфта мешавад, ки Садриддин Набиев, маъмури тарабхонаи “Миллениум” Фирӯза Ҳафизоваро барои ҳунарнамоӣ даъват кардааст. Зимни ҳунарнамоии овозхон шаҳрвандон Сайфиддини Сайнуриддин ва Сабоҳат Исломов дидаву дониста талаботи қонунгузориро поймол намуда, нисбати асъори миллӣ беэҳтиромӣ зоҳир карда, купюраҳои гуногуни асъори миллиро ба сари Фирӯза Ҳафизова пошидаанд. Сароянда низ нисбати асъори миллӣ беэҳтиромӣ зоҳир намуда, пули миллиро поймол кардааст.

Дар навбати худ Фирӯза Ҳафизова чунин мегӯяд: "Аз кардаи худ пушаймонам ва кӯшиш мекунам, ки дигар чунин амал такрор нашавад".

Мақомот шарҳ надодааст, ки сароянда ва ду касе, ки ба сари ӯ пул пошиданд чӣ гуна ҷазо мегиранд.

Dialog.tj