Бинобар иттилои АМИТ “Ховар”, дар шаҳри Душанбе Корхонаи воҳиди давлатии «Маркази рақамикунонӣ, инноватсия ва такмили кадрҳои соҳаи кишоварзӣ» ифтитоҳ гардид.

Гуфта мешавад, ки дар маросими ифтитоҳ Сарвазири Ҷумҳурии Тоҷикистон Қоҳир Расулзода иштирок намуда, нахуст намоишгоҳи дастовардҳои илмӣ ва инноватсионии соҳаи кишоварзии мамлакат пешниҳод гардид.

“Сарвазири Ҷумҳурии Тоҷикистон Қоҳир Расулзода иброз намуд, ки ифтитоҳи Маркази рақамикунонӣ, инноватсия ва такмили кадрҳои соҳаи кишоварзӣ оғози марҳилаи нави технологӣ дар соҳаи кишоварзӣ мебошад. Тавассути сиёсати дурбинонаи Президенти Ҷумҳурии Тоҷикистон муҳтарам Эмомалӣ Раҳмон солҳои 2025-2030 дар Тоҷикистон «Солҳои рушди иқтисоди рақамӣ ва инноватсия» эълон гардиданд. Ҳадафи он навсозии пурраи иқтисодиёт ва таъмини зиндагии шоистаи мардум таввасути технологияи муосир мебошад”, - зикр мегардад дар иттилоия.

Афзуда мешавад, ки Ҳукумати Ҷумҳурии Тоҷикистон дар доираи “Стратегияи миллии рушд барои давраи то соли 2040” иқтисоди рақамиро фаъолона пеш бурда, ба рақамикунони хизматрасониҳои давлатӣ, рушди инфрасохтор, амалӣ намудани зеҳни сунъӣ ва таъмини амнияти миллӣ диққати аввалиндараҷа медиҳад.

Зикр мегардад, ки маркази мазкур тавассути Лоиҳаи баланд бардоштани устувории кишоварзӣ бо дастгирии Бонки ҷаҳонӣ пурра таъмир ва бо таҷҳизоти муосир таъмин гардид.

Dialog.tj