Раёсати Вазорати корҳои дохилӣ дар шаҳри Душанбе аз боздошти зане хабар дод, ки хонаашро ба фасодхона табдил додааст.

Манбаъ менависад, ки Пирумқулова Насиба, соли таваллудаш 1984, аз ҷониби кормандони ШВКД-1 дар ноҳияи Сино, барои ташкил намудани фасодхона дастгир карда шуд. Номбурда дар манзили истиқоматии худ барои истеъмоли воситаҳои нашъадор шароит фароҳам оварда, мунтазам шаҳрвандоне, ки ба истеъмоли маводи нашъадор майл доранд, дар он ҷо ҷамъ мешудаанд.

Гуфта мешавад, ки зимни чорабиниҳои оперативӣ ҳангоми ба истеъмоли воситаҳои нашъадори навъи «Метамфетамин» машғул будан, шаҳрвандон Зубайдова Дилрабо, Асоев Умед, Содиқова Зебуниссо ва Пиров Довуд дастгир карда шуданд.

"Ҳангоми кофтуков аз манзили зисти Пирумқулова Н., асбобҳои барои истеъмоли воситаҳои нашъадор истифодашаванда, ҳамчун далели шайъӣ дарёфту мусодира карда шуданд", - гуфта мешавад дар хабарнома.

Иттилоъ дода мешавад, ки ҳоло дастгиршудагон дар ҳабси пешакӣ қарор дошта, бо мақсади оғоз намудани парвандаи ҷиноятӣ тибқи талаботи моддаи 205 Кодекси ҷиноятии Ҷумҳурии Тоҷикистон тафтишоти пешакӣ идома дорад.

Dialog.tj