Дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вобаста ба таҳлилу баррасии вазъи бемории сил дар кишвар, аз ҷумла дар шаҳри Душанбе ва шаҳру ноҳияҳои тобеи ҷумҳурӣ ҷаласаи корӣ доир гашт.

“Муовини вазири тандурустӣ ва ҳифзи иҷтимоии аҳолӣ Абдухолиқ Амирзода аз дастгирӣ ва таваҷҷуҳи хосаи роҳбарияти олии давлату Ҳукумати Тоҷикистон дар самти пешгирӣ ва ташхису табобати бемории сил дар мамлакат ёдовар шуда, қайд кард, ки маҳз дар натиҷаи андешидани тадбирҳои муҳиму саривақтӣ давоми солҳои охир шумораи гирифторони ин беморӣ дар ҷумҳурӣ коҳиш ёфта истодааст”, - омадааст дар иттилоияи маркази матбуоти Вазорати тандурустӣ.

Иттилоъ дода мешавад, ки бо мақсади ноил шудан ба ҳадафу вазифаҳои ба миён гузошташуда оид ба паст кардани сатҳи беморшавӣ ва фавт аз бемории сил ва шаклҳои устувори сил дар Ҷумҳурии Тоҷикистон, таъмини дастрасии ҳамагон ба хизматрасониҳои босифат оид ба пешгирӣ, табобат ва нигоҳубин дар самти ҳимоя аз бемории сил барои ҳар як шахс ҳоло “Барномаи миллии ҳимояи аҳолӣ аз бемории сил дар Ҷумҳурии Тоҷикистон барои солҳои 2021-2025” амалӣ гашта истодааст.

Dialog.tj