Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон хабар медиҳад, ки дар кишвар азнавбақайдгирии нафақагирон тариқи шинохти чеҳра амалӣ карда мешавад.

Гуфта мешавад, ки бо мақсади иҷрои супориши Протоколи маҷлиси Ҳукумати Ҷумҳурии Тоҷикистон аз 31-уми октябри соли 2025, №11 ҷиҳати гузаронидани азнавбақайдгирии нафақагирон тариқи шинохти чеҳра масъулини Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон ва Ҷамъияти саҳомии кушодаи «Марказҳои тасдиқкунанда, хизматрасониҳои давлатӣ ва таҳияи барномаҳои рақамӣ»-и Агентии инноватсия ва технологияҳои рақамии назди Президенти Ҷумҳурии Тоҷикистон ҷаласаи муштарак баргузор намуданд. 

Манбаъ меафзояд, ки дар Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон гурӯҳи корӣ барои муайян намудани чеҳраи шахсияти нафақагирон (Face ID) таъсис ёфтааст.

Дар ин росто, ба сардорони раёсатҳо дар вилоятҳо ва шаҳру ноҳияҳо супориш шудааст, ки то охири соли равон бақайдгирии рақамӣ, яъне айниятнкунонии чеҳраи нафақагиронро ба анҷом расонанд.

Dialog.tj