Президенти Федератсияи Русия Владимир Путин дар ҷараёни сафараш ба Қирғизистон вазъиятро дар робита ба қатори дарози мошинҳои боркашу фураҳо дар марзи Русия ва Қазоқистон шарҳ дод.

Владимир Путин гуфт, ки мушкил баъди он ба вуҷуд омад, ки бо супориши ӯ мақомоти гумруки Русия дар доираи қарорҳои Иттиҳоди иқтисодии Авруосиё санҷишҳои интихобии нақлиёти боркашро дар роҳҳо оғоз намуданд. 

“Маълум шуд, ки қисми зиёди молҳову шумори зиёди ҳамин мошинҳои боркаш, фураҳо, чунон ки шумо гуфтед, тамоман бидуни ҳич гуна санад марзи Русия ва Қазоқистонро убур мекунанд” – гуфт Владимир Путин.

Ӯ таъкид кард, ки ҳар як мошини боркаш уҳдадор аст маҷмуи санадҳои аз ҷониби кишварҳо мувофиқашударо дошта бошад.

“Ин бояд санад бошад. Коғазе, ки нишон диҳад, дар дохили ин фура чӣ мавҷуд аст ва ақаллан бояд маълум бошад, ки ин мол ба номи кадом қабулкунанда равон шудааст. Аз санади аввал рӯшан мешавад, ки арзиши гумрукии молу маблағи боҷу гумрук барои убур аз марзи мо чӣ қадар аст ва кӣ бояд дар вақти гирифтани ин мол маблағи ААИ-ро пардохт намояд. Ҳамин ки санҷишҳо оғоз шуданд, маълум гардид, ки умуман ҳич санаде нест. Ин комилан воридоти сиёҳ аст ва узр аз лаҳни ноҷо, мустақиман ба қаламрави гумруки мо ворид мешавад. Федератсияи Русия бидуни муболиға миллиард ва даҳҳо миллиард рубл аз буҷеташро аз даст медиҳад” - гуфт Президенти Русия.

Владимир Путин ҳамчунин, гуфт, ки вазъиятро бо президенти Қзоқистон Қосим-Жомарт Токаев баррасӣ кардааст. Бар асоси гуфтаи ӯ, ду кишвар мувофиқа намуданд, ки ҳаракати нақлиёт тез шавад. Хадамоти гумруки ҳар ду ҷониб тартиби нишон додани арзиши молу маълумот дар хусуси қабулкунандагонро мувофиқ намудааст.

Владимир Путин таъкид кард, ки интизор меравад мушкилоти навбатии мошинҳои боркаш дар марзи Русия ва Қазоқистон то охири соли 2025 пурра ҳал шавад.

Аз моҳи сентябр дар марзи Қазоқистону Русия навбатҳои тӯлонии фураҳо ба вуҷуд омадаанд. Барои мубориза бо “импортҳои соябӣ” ҷониби Русия санҷиши мошинҳои боркашро шадидтар кард ва декларатсияҳоро дақиқтар меомӯзад.

Dialog.tj