Ҳайати бошгоҳи “Ал-Наср”-и Арабистони Саудӣ бо шумули футболбозони маъруф Садио Мане, Жоау Феликс, Марсело Брозович, Иниго Мартинес ва дигарон шоми 24-уми ноябр ба пойтахти кишвар омад.

Тавре ки интизор мерафт, ҳамлагари дастаи мазкур Криштиану Роналду ба Тоҷикистон наомад. Сафар накардани ӯ расман шарҳ дода нашудааст, вале қаблан расонаҳо иттилоъ дода буданд, ки мувофиқи шартномаи нав футболбози португалӣ имкон дорад дар бозиҳои меҳмонии Лигаи дуюми қаҳрамонҳои Осиё иштирок накунад.

Гуфтан ба маврид аст, ки бошгоҳи “Истиқлол”-и Тоҷикистон бо “Ал-Наср”-и Арабистони Саудӣ 26-уми ноябр дар Варзишгоҳи марказии шаҳри Ҳисор дар доираи даври 5-уми Лигаи дуюми қаҳрамонҳои Осиё рақобат хоҳад кард.

Гуфта мешавад, ки ҳоло дар гурӯҳи “D” бошгоҳи “Ал-Наср” 12 имтиёз дошта, дар ҷойи якум қарор дорад. Дастаҳои “Аз-Завра” ва “Истиқлол” бо 6 холӣ дар ҷойҳои дуюму сеюм мавқеъ гирифта, бошгоҳи “Гоа” бидуни имтиёз дар ҷои охир қарор дорад.

 Dialog.tj