Солеҳа Холмаҳмадзода, вазири меҳнат, муҳоҷират ва шуғли аҳолии Ҷумҳурии Тоҷикистон бо намояндагони ширкати TELC GmbH Винфрид Элвангер ва Қурбанӣ Монассер Фараҳ дар Душанбе вохӯрӣ намуд.

Зимни мулоқот вазири меҳнат, муҳоҷират ва шуғли аҳолии Ҷумҳурии Тоҷикистон аҳамияти ҳамкориии Тоҷикистону Олмонро дар самтҳои таҳсилоти касбӣ, омӯзиши забони олмонӣ, арзёбии дониш ва омодасозии мутахассисони ҷавобгӯ ба талаботи бозори меҳнати Олмон муҳим арзёбӣ кард.

Бинобар иттилои маркази матбуоти Вазорати меҳнат, муҳоҷират ва шуғли аҳолии Ҷумҳурии Тоҷикистон, зимни вохӯрӣ ҷонибҳо таъкид карданд, ки равобити Тоҷикистону Олмон дар соҳаи меҳнат ва таҳсилоти касбӣ сол аз сол густариш ёфта, саҳми шарикони олмонӣ, аз ҷумла Институти ҳамкории байналмилалии Ассотсиатсияи таълими калонсолони Олмон (dvv international), Филиали Ассотсиатсияи Каритаси Олмон дар Ҷумҳурии Тоҷикистон, Ҷамъияти ҳамкориҳои байналмилалии Олмон (GIZ) ва Фонди хазинаҳои амонатгузориии Олмон оид ба ҳамкориҳои байналмилалӣ (German Sparkassenstiftung) дар рушди бозори меҳнат, такмили малакаҳои касбӣ, дастгирии муҳоҷирон ва ташаббусҳои соҳибкорӣ назаррас арзёбӣ мешавад.

Ҳамчунин, гуфта мешавад, ки ҳамкории нав бо TELC GmbH барои баланд бардоштани савияи дониш, рушди малакаҳои касбӣ ва рақобатпазирии шаҳрвандони Тоҷикистон дар бозори байналмилалии меҳнат имкониятҳои нав фароҳам меорад.

Dialog.TJ