Тибқи иттилои Муассисаи давлатии «Маркази барномаҳои байналмилалӣ» намояндаи ин ниҳод Тоҷиддини Баҳриддин дар доираи сафари корӣ ба Давлати Гренада бо роҳбарияти Донишгоҳи тиббии Сан Ҷорҷ (St. George’s University) вохӯрӣ намуд.

Ба қавли манбаъ, дар ҷараёни мулоқот ҷонибҳо имконияти васеи ҳамкориро дар соҳаи таълим ва омодасозии кадрҳои тиббӣ мавриди баррасӣ қарор доданд.

Гуфта мешавад, ки яке аз масъалаҳои муҳими мулоқот ин ба роҳ мондани раводиди ройгон барои донишҷӯёни Тоҷикистон мебошад. Ҷонибҳо таъкид карданд, ки сода кардани раванди раводид имконият медиҳад, ки шумораи бештари ҷавонон аз Тоҷикистон дар ин муассисаи бонуфуз таҳсил намоянд.

Намояндаи Маркази барномаҳои байналмилалӣ пешниҳод кардааст, ки барои донишҷӯёни тоҷик тахфиф дар таҳсил, барномаҳои дастгирии молиявӣ, инчунин, ҳамкориҳо дар ҳамаи зинаҳо - резидентура, ординатураи клиникӣ, internship, clerkship ва барномаҳои таҷрибаомӯзии амалии табибон ба роҳ монда шаванд. Ҷонибҳо барои таҳияи нақшаи мушаххаси ҳамкорӣ дар ин самт ба мувофиқа расиданд.

Иттилоъ дода мешавад, ки дар ҳоли ҳозир дар донишгоҳи мазкур зиёда аз 7 ҳазор донишҷӯ аз 150 кишвари ҷаҳон таҳсил мекунанд. Аз ҷумла 9 донишҷӯи тоҷик ҳоло таҳсил доранд.

Dialog.TJ