18-уми ноябр дар шаҳри Дарвини Австралия тими миллии Тоҷикистон дар доираи даври панҷуми марҳилаи интихобии Ҷоми Осиё-2027 дар гурӯҳи “А” бо мунтахаби Тимори Шарқӣ рақобат мекунад.

Тавре ки Федератсияи футболи кишвар хабар медиҳад, дар ҷаласаи пеш аз вохӯрӣ, ки масъулини бозӣ, кумитаи тадорукоти маҳаллӣ ва намояндагони дастаҳои Тимори Шарқӣ ва Тоҷикистон иштирок доштанд, ранги либосҳои дастаҳо интихоб шуданд. Мунтахаби Тоҷикистон бо либосҳои сафед ва ва тими миллии Тимори Шарқӣ бо либосҳои сурх ба майдон мебароянд.

Сармураббии тими миллии Тоҷикистон Горан Стеванович дар нишасти матбуотии пеш аз бозӣ чунин ибрози назар намуд: “Мо чанд рӯз пеш ба Дарвин омадем, то бачаҳо ба иқлими маҳаллӣ ва фарқи вақт мутобиқ шаванд. Ду рӯзи аввал душвор буд, аммо бозигарон алакай одат карданд. Тимори Шарқиро хуб мешиносем. Онҳо дар меҳмонӣ бо Филиппин қариб баробар бозӣ карда, ҳатто пешсаф шуданд. Ин даста дар ҳайати худ якчанд бозигарони тезсуръат дорад. Рақибони худро ҷиддӣ қабул мекунем ва барои бозии оянда омодагӣ мебинем. Барои дарёфти се хол ба Дарвин омадаем ва танҳо барои пирӯзӣ рақобат хоҳем кард”.

Dialog.tj