Сафир ва намояндаи доимии Ҷумҳурии Исломии Эрон дар Созмони Милали Муттаҳид Амирсаид Иравонӣ гуфт, ки Эрон дар баробари таҳдиду фишор ва иқдомҳои иҷборӣ ҳич гоҳ таслим нахоҳад шуд.

Тибқи гуфтаи ӯ, ҷавоби Эрон фақат ба эҳтиром, қонуният ва баробарӣ асос меёбад ва “таҷовузи низомиву терроризми иқтисодӣ ҳич вақт Теҳронро водор намекунад, ки аз ҳуқуқи қонунии худ даст кашад”.

Ӯ рӯзи ҷумъа дар маҷлиси Маҷмаи Умумии Созмони Милали Муттаҳид дар шаҳри Ню-Йорк суханронӣ карда, афзуд, ки гузоришҳои Агентии байналмилалии неруи атомӣ бояд касбӣ, воқеӣ ва дур аз сиёсатгузорӣ бошанд, зеро эътимоди ҷомеаи байналмилалӣ ба бетарафии ҳамин гузоришҳо вобаста мебошад.

Амирсаид Иравонӣ бо таъкид ба ҳаққи табиии кишварҳои дар ҳоли рушд барои истифодаи сулҳомези неруи атомӣ гуфт, ки “энергияи атомӣ барои рушди иқтисодӣ ва амнияти энергетикӣ як унсури зарурӣ” мебошад ва талошҳо барои маҳдуд кардани ин ҳақ “нақзи ҷиддии руҳ ва матни созишномаи NPT” мебошад.

Ӯ ҳамчунин, амали кишварҳои ғарбиро, ки дастрасии кишварҳои рӯ ба рушдро ба технологияҳои атомӣ маҳдуд мекунанд ва дар айни ҳол, ба режими Исроил, ки узви NPT нест, ин “меъёрҳои дугона” низоми ҷаҳонии пешгирии нашри силоҳҳои атомиро заиф месозад.

Сафири Эрон ҳамлаҳои артиши Исроил ба марказҳои атомии Эрон дар моҳи июни соли 2025-ро “амали таҷовузкорона ва ҷинояткорона” номид ва Иёлоти Муттаҳидаи Амрикоро барои ҳамдастӣ дар ин ҳамла муттаҳам кард. Ба гуфтаи ӯ, ин амалҳо “на фақат бар зидди Эрон, балки бар зидди эътибори СММ низоми пойдорсозии амнияти атомӣ” равона шудаанд.

Амирсаид Иравонӣ таъкид кард, ки бар хилофи муқаррароти байналмилалӣ, ин ҳамлаҳо аз сӯи Агентии байнламилалии атомӣ, Шурои Амният ва ҳатто раиси Маҷмаи умумӣ маҳкум нашудаанд. Ӯ афзуд, ки “бо вуҷуди террор, таҳримҳои ғайриқонунӣ, хисорот ва ҳамлаҳои мустақим ба иншооти атомӣ Эрон ҳич вақт муқаррароти NPT ва ё уҳдадориҳои худ дар чорчӯби пойдорсозиро нақз накардааст”.

Ӯ таъкид намуд, ки боз доштани қисми равобити техникӣ бо Агентии байналмилалии атомӣ “натиҷаи мустақими ҳамлаҳои низомӣ” аст ва масъулияти он ба дӯши “таҷовузкорон мебошад, на қурбонӣ”.

Дар идома намояндаи Эрон ба бастани роҳҳои дипломатӣ аз ҷониби се кишвари аврупоӣ ишора карда, фаъолсозии механизми “моша”-и ин кишварҳоро “ғайриқонунӣ ва беэътибор” донист. Ӯ афзуд, ки бо анҷоми муҳлати қатъномаи 2231 дар 18 –уми октябри соли 2025, ҳамаи маҳдудиятҳои барҷомӣ хотима ёфтаанд ва ҳар талош барои баргардондани онҳо” сӯистифода аз равандҳои ҳуқуқӣ” аст.

“Эрон ҳич гоҳ дар баробари таҳдид таслим намешавад. Посухи мо фақат ба эҳтиром ва қонуният аст”- зикр намуд Амирсаид Иравонӣ.

Dialog.tj