Баъди баргузории музокироти расмӣ дар Кремл, Президенти Федератсияи Русия ва Қазоқистон дирӯз санади муҳиммеро имзо намуданд, ки бар асоси он робитаҳои миёни ду кишвар ба сатҳи шарикии комил ва ҳампаймонии стратегӣ расиданд.

Владимир Путин ва Қосим-Жомарт Токаев дар ҳузури ҳайатҳои ду кишвар ин санадро ба имзо расонданд.

Владимир Путин таъкид намуд, ки робитаҳои Маскаву Остона ҳамвора дар ҳоли рушд буда, Русия талош дорад, ин ҳамкориро ба сатҳи баландтар бардорад. Ба гуфтаи ӯ, арзиши лоиҳаҳои муштараки дарназардоштаи ду кишвар ба даҳҳо миллиард доллар мерасад ва ширкатҳои қазоқистонӣ фаъолона дар Русия фаъолият доранд. Ҳамчунин, беш аз 90 фоизи муомилоти молӣ миён ду кишвар бо асъори миллӣ анҷом мешавад.

Президенти Русия гуфт, музокирот бо Қосим-Жомарт Токаев созандаву натиҷабахш аст ва дар он масъалаҳои байналмилалӣ, бахусус ҳамкориҳои иқтисодӣ баррасӣ шудаанд. Ба гуфтаи ӯ, имзои санади баланд боло бурдани сатҳи равобити ду кишвар ба “ҳамкории комил” яке аз натиҷаҳои муҳимми ин музокирот маҳсуб мешавад.

Президенти Федератсияи Русия ҳамчунин, хабар дод, ки ширкати “Газпром” имкони густариши интиқоли газ ба Қазоқистон, аз ҷумла ба минтақаҳои шимолӣ ва шарқии ин кишварро баррасӣ мекунад. Дар баробари ин, Маскав ва Остона дар мавриди афзоиши ҳамкориҳо дар соҳаи истихроҷи унсурҳои нодир низ музокира доранд.

Президенти Қазоқистон дар суханрониаш дар Кремл гуфт, ки миқёси ҳамкории ду кишвар “беназир” аст ва дар ҳамаи соҳаҳо идома дорад. Қосим Жомарт-Токаев таъкид намуд, ки ҳамгироӣ ва ҳамкориҳои Остона ва Москав бо вуҷуди шароити мураккаби байналмилалӣ рӯ ба рушд мебошад.

Ӯ афзуд, ки санади нави ҳамкории комил нишондиҳандаи сатҳи баланди эътимод ва дурнамои робитаҳои ду кишвар мебошад. Ба гуфти Қосим Жомарт-Токаев Русия “муҳимтарин шарики тиҷоратӣ ва сармоягузории Қазоқистон аст ва ду кишвар дар марҳилаи ниҳоии имзои қарордоди бунёди неругоҳи атомӣ дар Қазоқистон қарор доранд.

Қосим-Жомарт, Токаев ҳамчунин, аз Владимир Путин даъват кард, ки дар соли 2026 бо сафари расмӣ ба Қазоқистон ояд.

Дмитрий Песков, сухангӯи Кремл арзиши стратегии ин санади нави ҳамкориро таъкид карда буд. Ба навиштаи хабаргузории ТАСС Русия муносибатҳои хориҷии худро бо Эрон, Венесуэла, Индонезия, Чин, Кореяи Шимолӣ ва чанд кишвари дигар низ дар сатҳи “шарикии стратегӣ” қарор додааст.

Президенти Қазоқистон шоми сешанбе дар оғози сафари дурӯзаи худ ба Маскав дар Кремл бо Путин мулоқоти ғайрирасмӣ анҷом дода буд.

Dialog.tj