Тавре ки аз шуъбаи рушди сайёҳии Мақомоти иҷроияи ҳокимияти давлатии шаҳри Душанбе хабар медиҳанд, дар Боғи Куруши Кабир “Кӯчаи сайёҳӣ” ташкил карда шуд.

Ба навиштаи манбаъ, бо дастгирии Мақомоти иҷроияи ҳокимияти давлатии шаҳри Душанбе ҷиҳати рушди соҳаи сайёҳӣ, тарғиби фарҳанги миллӣ, ҳунарҳои дастӣ, муаррифии зарфиятҳои сайёҳӣ, таъмини фазои фарҳангии пойтахт ва фароғати сокинону меҳмонони он дар доираи тақвияти ҳамкориҳои бародаршаҳрӣ миёни шаҳрҳои Душанбе ва Теҳрон дар Боғи Куруши Кабир кӯчаи сайёҳии мавсимӣ ташкил карда шуд.

Гуфта мешавад, ки “Кӯчаи сайёҳӣ” дар Боғи Куруши Кабир дар доираи Намоишгоҳи байналмилалии сайёҳии Душанбе – 2025 аз ҷониби ширкати “Ҳафт Иқлим Барман”-и Ҷумҳурии Исломии Эрон дар ҳамкорӣ бо ширкати сайёҳии “Сайёҳати диёр” ташкил шуда, аз 11-ум ноябр то 11-уми декабри соли равон фаъолият менамояд.

Дар “Кӯчаи сайёҳӣ”-и Боғи Куруши Кабир баргузории барномаҳои фарҳангӣ, намоиш ва фурӯши маҳсулотҳои ҳунарҳои мардумӣ, хӯрок ва хӯришҳо, шириниҳо ва обҳои ташнашикани Тоҷикистону Эрон, бозиҳои шавқовари варзишиву зеҳнӣ, озмуну викторинаҳо, бозиҳои сиркӣ, намоиши театрӣ, гӯшаи аксбардорӣ бо либосҳои миллӣ ва дигар чорабиниҳои фароғатӣ дар назар аст.